Galicia suma cerca de 500 centros distribuídos por toda a comunidade con configuracións e características diversas que dan asistencia sanitaria a unha poboación de 2,7 millóns de habitantes.

Neste sentido a dispersión da poboación é un reto que require dispoñer de centros que permitan proporcionar un servizo universal á poboación. Así, esta acción centrarase na construción, reforma e adaptación de centros de saúde de acordo ao Plan de Infraestruturas de Atención Primaria, completando as infraestruturas existentes, dando un maior e mellor servizo á poboación e liquidando as carencias funcionais e operativas actuais, adaptándose á evolución demográfica da poboación de referencia á que prestan servizos. Este plan está aliñado co Marco Estratéxico de Atención Primaria e Comunitaria.

O proxecto de construción dun centro de saúde en A Rúa (provincia de Ourense) supón a creación dun novo centro de saúde cunha superficie útil de 1.120,46 m² / 1.311,50 m² de superficie construídos, que se concibe para dar unha correcta cobertura sanitaria á poboación da área de referencia mellorando o servizo de atención primaria coa execución do novo plan funcional, aprobado pola Dirección Xeral de Asistencia Sanitaria o 23 de novembro do 2021, relativo ao novo centro de saúde da Rúa.

O proxecto desenvolve un centro de saúde de planta baixa e planta primeira con acceso dende unha zona exterior cuberta. O centro dotarase, entre outros, co servizo de pediatría, sala polivalente de respiratorios, consulta polivalente, sala de técnicas, odontoloxía, traballo social, sala de educación para a saúde e consulta da muller.  A entrada situase de tal xeito que queda estreitamente relacionada co parque público lindeiro Sur, para que de xeito natural, a chegada ao Centro de Saúde se poda facer peonalmente a través do parque.