O proxecto supón un centro de saúde cunha superficie útil de 1.754,34 m² / 2.351,14 m² de superficie construídos, que se concibe para dar unha correcta cobertura sanitaria á poboación da área de referencia mellorando o servizo de atención primaria coa execución dos plans funcionais, aprobados pola Dirección Xeral de Asistencia Sanitaria o 30 de maio do 2018 e 31 de maio do 2018, relativos ao centro de saúde e unidade de saúde mental de Conxo en Santiago de Compostela.

O proxecto desenvólvese en tres plantas. Na planta baixa sitúase o centro de saúde, ademais do vestíbulo de acceso e a recepción, seis consultas para medicina e enfermería xeral, unha consulta de medicina e outra de enfermería pediátrica, unha sala de toma de mostras e dúas salas polivalentes. Na planta primeira sitúase a unidade de saúde mental, con catro consultas de psiquiatría, catro de psicoloxía, dúas de psicoxeriatría, e unha de terapia, unha de enfermería, unha de psicoloxía xeriátrica e outra de odontoloxía. Na planta segunda sitúanse dúas consultas de psicoloxía, dous despachos para traballadores sociais, e salas de reunións, aseos e vestiarios, diferenciados para os traballadores do centro de saúde e da unidade de saúde mental, ademais de almacéns, oficios, aseos para público en todas as plantas, cuartos de instalacións, circulacións e demais espazos comúns.