VOLVE
A INFORMACIÓN EPIDEMIOLÓXICA DOS VENRES
Este
número
retoma a publicación de Venres Epidemiolóxico, que se
suspendera hai case tres anos debido ao impacto que a pandemia da
COVID-19 tivo nos servizos de saúde pública. A parte de cambios
menores no aspecto, da actualización da pirámide de poboación que lle
serve de imaxe de referencia [ver apéndice] e dun cambio na
periodicidade da publicación, que pasa a ser mensual (segundo venres de cada mes), a selección de temas e o modo de tratalos continuarán a
ser os mesmos que anteriormente, conforme aos principios formulados
no primeiro
número
de Venres.
ESCABIOSE: ¿RESISTENCIA OU USO INADECUADO DO TRATAMENTO?
A
sarna, ou escabiose humana, é unha enfermidade da pel producida polo
ácaro Sarcoptes Scabiei variedade hominis. A súa gran
capacidade de transmisión xunto a unha baixa sospeita clínica, fan que
sexan frecuentes os abrochos en institucións pechadas, sobre todo en
residencias de maiores.
En
Galicia, os abrochos son de declaración obrigatoria e, dende o ano
2015, viñanse observando unha media anual de 8 abrochos de sarna.
Durante o ano 2022, notificáronse 17 e, no que vai de ano, son xa 3 os
declarados. Estes datos coinciden cun aumento observado a nivel
mundial [1],[2]
Paralelamente
ao
aumento de casos, estase a percibir un aumento dos fracasos
terapéuticos relacionados co uso de permetrina ao 5% como tratamento
de primeira liña. Este fracaso pode ter unha orixe
multifactorial [3], [4], [5]:
- Erros
na aplicación do tratamento (Ex.: insuficiente extensión da crema,
lavado de mans antes de 8 horas ou aplicación única en lugar das
dúas recomendadas).
- Ausencia
de medidas hixiénicas ambientais ou non tratamento simultáneo dos
contactos, podendo levar a unha reinfestación.
- Pacientes
con mobilidade reducida ou uso de esteroides tópicos previos ao
diagnóstico.
Así
mesmo,
o prurito residual, unha vez erradicada a infestación, pode durar ata
4-6 semanas despois de rematar o tratamento, podendo facer pensar
erroneamente nun fracaso terapéutico.
Non
obstante,
a resistencia do ácaro á permetrina é preciso tela en conta, pero ata
o momento non se atoparon estudos concluíntes que avalen esta perda de
eficacia. Polo tanto, recoméndase manter a permetrina como tratamento
de primeira liña e, só no caso de confirmarse enfermidade activa a
pesar de non encontrar ningún erro, utilizarase o tratamento de
segunda liña recomendado segundo o tipo de paciente e que se detalla
no anexo II do protocolo
da
DXSP.
A
ivermectina oral, xa comercializada en España, pode resultar útil nos
abrochos extensos en institucións pechadas ou cando se prevexan
dificultades para o cumprimento correcto da aplicación de tratamento
tópico.
Finalmente,
lembramos
a importancia de que o profesional sanitario que diagnostique un caso
de sarna nun paciente relacionado cunha institución pechada se poña
rapidamente en contacto co SAEG para iniciar as medidas de control que
eviten ou atenúen a propagación dun posible abrocho.
CALENDARIO DE VACINACIÓN PARA TODA A VIDA
O
pasado 15 de setembro entrou en vigor o Calendario
de
vacinación ao longo de toda a vida que supón un cambio na
mentalidade sobre a vacinación, xa que non se contempla só como unha
estratexia infantil de vacinación senón que se visualiza como
unha protección en todas as etapas da vida, desde a etapa prenatal ata
a idade adulta. Ademais, introduce as seguintes novidades
Inclúese
a
vacina fronte ao virus do papiloma humano nos varóns de 12 anos nados
a partir do 1 de xaneiro de 2010, para protexelos fronte ao cancro de
pene e orofarínxeo así como para complementar a protección nas
mulleres fronte ao cancro de cérvix (protección de grupo).
Así
mesmo,
incorpórase á vacinación fronte a meninxite B para os nenos nados
a partir do 1 de setembro de 2022, 2 e 4 meses así como un recordo aos
12 meses de idade.
Inclúese
a
recomendación de vacinar fronte á gripe aos nenos e nenas entre os 6 e
59 meses de idade. Esta recomendación baséase na elevada carga da
enfermidade e de hospitalización neste grupo de idade, así coma nas
complicacións, infeccións bacterianas secundarias e consumo de
antibióticos asociados. Ademais, a vacinación na infancia diminúe a
enfermidade noutros grupos de idade ao reducir a transmisión dos nenos
ás persoas vulnerables.
Modifícase
a
vacina fronte ao meningococo C, indicada aos 12 meses de idade
substituíndose pola vacina tetravalente que inclúe os serotipos
ACWY, para os nenos e nenas nacidos a partir do 1 de novembro de 2021.
PIRÁMIDE POBOACIONAL DE GALICIA 2012-2022
Na
imaxe superior podemos observar as pirámides de poboación de Galicia
do ano 2012, en azul claro no fondo, e do ano 2022, superposta en
negro. Nelas represéntase a distribución por idade e sexo da poboación
do noso territorio.
No
eixo vertical móstranse os valores de poboación das diferentes idades,
mediante o cal podemos apreciar fenómenos demográficos como o
envellecemento que se está a sufrir do 2012 ao 2022, así como a
redución da taxa de natalidade. A idade media dos homes pasou
dos 43 anos, no 2012, aos 46 anos no 2022. No caso das
mulleres, a idade media pasou dos 46 aos 49 anos.
No
eixo horizontal representase a porcentaxe de persoas que supón cada
sexo segundo a súa idade, no lado esquerdo vemos a poboación masculina
e no dereito a feminina. Aquí podemos observar como a porcentaxe homes
e mulleres mantense practicamente igual ca no ano 2012, cun porcentaxe
lixeiramente superior de homes nas idades máis xoves e un aumento
paulatino da porcentaxe de mulleres conforme avanza a idade.
