De forma natural ó envellecer prodúcense unha serie cambios que fan máis doado que os anciáns sufran accidentes. Algúns destes cambios son, por exemplo, a diminución do oído e da vista, unha menor habilidade para os movementos e máis tendencia ó esgotamento xeral. Moitas enfermidades e algúns tratamentos, que se fan máis frecuentes coa idade, aumentan o risco de caídas ó altera-lo equilibrio, producir inestabilidade ou dificulta-la marcha.

Ademais, as consecuencias son máis graves co paso dos anos: os ósos rompen máis doadamente e tanto as fracturas como as feridas importantes obrigan ó repouso e dependencia doutras persoas. Moitas veces aparece ansiedade por temor a caer outra vez e o ancián perde a confianza en si mesmo.

Un número importante de caídas prodúcense no fogar e en parte son debidas a barreiras ou obstáculos que poden ser reducidos ou eliminados doadamente cunha serie de precaucións, medidas simples e cambios de hábitos:

- Convén utilizar sempre calzado cómodo e á medida, de tacón baixo e con solas antiesvaradías. Débense evitar chancas, zapatillas abertas por detrás e o calzado demasiado frouxo, porque non suxeitan ben o pé. É importante non camiñar descalzo e nunca con medias ou calcetíns directamente en contacto co chan.

- Utilice roupa cómoda que non dificulte os movementos e que non poida pisarse ou engancharse.

- Utilice bastón se o precisa, se o seu médico llo aconsella ou se se sente inseguro ó camiñar, porque así aumentará a súa base de apoio.

- Na vivenda:

Instale unha boa iluminación en toda a casa, e especialmente nas escaleiras. Convén que os interruptores estean situados ó lado da porta de cada cuarto e que a luz do dormitorio se poida acender desde a cama para non se erguer ás escuras. Procure que os mobles sexan estables e estean colocados sempre no mesmo sitio para evitar desorientacións que facilitarían a caída. Manteña o chan libre de obstáculos, cables e outros obxectos sobre todo nas zonas de paso. Evite camiñar sobre superficies esvaradías (graxentas, acabadas de encerar ou moi pulidas) sobre todo se están molladas ou se está descalzo. Convén un pavimento antiesvaradío especialmente en cociña e baño. Repara-lo máis rapidamente posible baldosas levantadas e outros danos no chan nos que se poida tropezar. As alfombras, con frecuencia, provocan caídas. Se se utilizan deberán estar firmemente suxeitas ou adheridas ó chan e sen deixar libres os extremos para que non se despracen nin se engurren. En xeral convén evita-las alfombras e tapetes pequenos sobre todo en zonas de paso. É moi importante que as escaleiras estean ben iluminadas, que dispoñan de pasamáns, se é posible a ámbolos dous lados, e que os seus chanzos sexan antiesvaradíos. Convén colocar adhesivos antiesvaradíos ou alfombras plásticas especiais para evitar esvarar na bañeira ou na ducha e instalar unha barra, asa ou varanda para agarrar ó ducharse ou mesmo ó erguerse do retrete. Tamén resultan de grande axuda os asentos de ducha ou bañeira. Na cociña todo debe estar ó alcance da man para non subir a escaleira ou tallos. Se se derraman graxas ou outros líquidos, débese limpa-lo chan inmediatamente. Evite movementos e cambios de postura bruscos. Ó levantarse da cama ou dunha cadeira fágao lentamente, sentando uns minutos no bordo antes de poñerse de pé. Evite consumir bebidas alcohólicas en exceso. Visite o seu médico para o seguimento do seu estado de saúde e o control da medicación e os seus posibles efectos secundarios. Recorde que con moitos medicamentos pode aparecer mareo ou inestabilidade e se isto sucede debe comentalo. Consulte se nota perda de visión, de oído, mareos, etc   ELIMINAR OBSTÁCULOS INNECESARIOS, MANTE-LA ORDE E UN ÁMBITO COÑECIDO E ADAPTADO ÁS CONDICIÓNS DO ANCIÁN AUMENTAN A SÚA SEGURIDADE, A SÚA CALIDADE DE VIDA E A DOS QUE O RODEAN ESTAS MEDIDAS SON RECOMENDACIÓNS XERAIS. NON DUBIDE EN CONSULTAR CO SEU MÉDICO. EL PODERÁ MODIFICALAS E AXUSTALAS ÁS SÚAS CONDICIÓNS CONCRETAS