¿En que consiste?

Trátase dunha dor localizada na parte baixa das costas que se orixina a nivel da columna vertebral, os músculos, ligamentos ou nervios da zona. Así, cando unha dor nesa mesma rexión é debida a outros motivos, como por exemplo un cólico de ril, non se trata de lumbago ou lumbalxia. É un síntoma moi frecuente, que padecen o 70% das persoas nalgún momento da súa vida. A maioría dos casos resólvense de forma natural e só unha pequena parte (7% dos casos) desenvolve dor crónica. Poden ser moitas as causas da lumbalxia e tamén é frecuente que non se identifique un motivo concreto. Sen embargo, na maioría dos casos hai espasmo e contractura dos músculos da zona que produce dor, o que pola súa vez aumenta a contractura. No lumbago agudo típico a dor iníciase bruscamente, é intensa, acompáñase de rixidez e nun principio faise máis intensa co movemento, podendo estenderse a nádegas e parte superior da coxa. A inactividade e mala forma física, os esforzos e sobrecargas da zona lumbar (cargar pesos ou esforzos físicos en posición forzada), posturas incorrectas e prolongadas (moitas horas sentados, en asentos inadecuados ou de pé) e o estrés, ansiedade e depresión aumentan o risco de sufrir dor de costas.

¿Como se trata?

O obxectivo do tratamento da lumbalxia aguda é reduci-la dor, recupera-la actividade e evitar que se faga crónica.

- Tanto os analxésicos como os antiinflamatorios son útiles para reduci-la dor e a limitación de movementos. Ademais, en determinados casos pode ser necesario empregar relaxantes musculares para elimina-la contractura e o espasmo. Os medicamentos deberán ser receitados polo médico dependendo de cada paciente, quen deberá respecta-la duración e forma de toma-lo tratamento, evitando sempre a automedicación.

- No lumbago común o repouso na cama (deitado boca arriba sobre unha superficie firme, coas cadeiras e xeonllos dobrados) debe limitarse ós primeiros momentos con dor intensa ó moverse, xeralmente entre dous e catro días.

- Non é eficaz permanecer na cama durante moito máis tempo e, sen embargo, sábese que é beneficioso para os pacientes manterse activos: melloran máis rápido os síntomas e diminúe o risco de que se faga crónico.

- Aplicar calor moderada na zona pode axudar a mellora-la incomodidade e a dor, pero non é indispensable no tratamento. Pode facerse en forma de duchas quentes ou un pano quente, con coidado para non provocar queimaduras na pel.

¿Que facer para previ-la dor lumbar?

- Póñanse de crequenas para levantar un obxecto do chan e ó facelo manteña as costas rectas, evitando dobrarse cara a diante cando o estea a alzar.

- Procure non cargar obxectos pesados, para movelos tente empurralos en lugar de levantalos.

- Séntese en cadeiras con costas rectas ou con apoios para as costas. Ó conducir, séntese dereito e mova o asento cara a diante, así evitará dobrarse cara a diante. Se debe conducir ou estar sentado durante longos períodos de tempo, faga descansos para estirarse e coloque unha almofada pequena ou unha toalla enrolada detrás da parte baixa das costas.

- Cando estea de pé manteña unha postura firme, con ombros e cadeiras en liña recta con cabeza e pescozo.

- Evite o calzado de tacón alto, non máis de 4 ou 5 cm.

- Fortalecemento dos músculos das costas. Camiñar e andar son bos exercicios globais para manter un bo estado físico e este último é especialmente axeitado para fortalece-la musculatura lumbar. Outra posibilidade é realizar un programa regular de exercicios, sen esquecer que é fundamental mante-la actividade xeral

¿Que se debe vixiar especialmente?

- Dor que se estende pola perna ata máis abaixo do xeonllo.

- Entumecemento e formigo na perna, pé ou ingua.

- Dor que aparece con febre, náuseas ou vómitos, molestias no ventre ou ó urinar, debilidade, ou sudoración.

- Dor causada por unha caída, golpe ou accidente.

- Dor tan intensa que impide calquera movemento e non se alivia co tratamento ou se a dor non parece mellorar despois de semanas.

Deberanse evitar posturas forzadas e os sobreesforzos sen adestramento e procura-lo fortalecemento dos músculos con exercicio moderado e regular. No lumbago común o repouso limitarase ós primeiros días de dor intensa co movemento; aínda que doia convén manterse activo.

ESTAS MEDIDAS SON RECOMENDACIÓNS XERAIS. NON DUBIDE EN CONSULTAR CO SEU MÉDICO. EL PODERÁ MODIFICALAS E AXUSTALAS ÁS SÚAS CONDICIÓNS CONCRETAS.